Translated from the English to the Nepali by Prakash Subedi
अभिलेख भनिने यो कार्डबोर्डको जेल

चिसो, हावाविहीन, र मृत्युजस्तै निस्तब्ध छ ।

भुइँदेखि छतसम्म चाङ् लगाइएका बाकसभित्र

सुनिन छाडिसके पनि भित्रभित्रै आर्तनाद गरिरहेका

आवाजहरू छन्

अनि छन्

अरूका एक-एक अंश बटुल्न छुटकारा दिने

विज्ञान, इतिहास, मानवशास्त्र वा अरू कुनै त्यस्तै विशिष्ट नाममा

संसारभरका सङ्ग्रहालय र विश्वविद्यालयका छिँडीमा

व्यवस्थाका साथ बन्द गरेर राखिएका

काटिएका शिरहरू र विखंडित विखण्डित शरीरका खुइलिएका हाडहरूजस्तै

देखिन छाडिसकेका, तर

अझै हराइरहेका बन्दी टुक्रा, बिम्ब र स्मृतिका जेलमा गुमनाम अनुहारहरू ।

चाङ् का चाङ् रेकर्डहरूले बताउँछन्

तिमीले कसरी हाम्रा टाउका पश्चिमा गजले एक-एक गरी नाप्यौ

आफ्ना दृश्यरतिक लेन्सले हाम्रो परीक्षण गर्यौ

माइक्रोस्कोपले हाम्रा बच्चाका नङ्हरू नियालेर हेर्यौ

र तिनलाई सार्है पहेँला पायौ

र, हेर्यौ महिलाका योनीभित्र

जहाँ कालो र गोरोको बिचमा देखिने

बुद्धि, उद्यम र बस्ती बसाउनेजस्ता

स्पष्ट अन्तरहरूका बाबजुद

गुलाबको त्यो कोपिला त्यति नै गुलाबी छ जति गुलाब गुलाबी छ ।

हामी कार्डबोर्डका कालकोठरीहरूमा थुनिएका कैदी हौँ

जहाँबाट एकनाससँग काटिएका अनि चिटिक्क पारेर सजाइएका

निर्जीव अक्षरले चित्कार गर्छन् :

यी सेता पन्नामाथि लेखिएको

कालो विषाद पढ ।