Blasphemous Lines for Mother | Ki Kyntien Bym Ïaroh Na ka Bynta I Mei

By | 1 October 2016

U Ap Jutang u pule shaphang ka jingïap u R. K. Narayan; u shim ïa
kawei ka makasin ba la rim bad u pule shaphang ka jingieit kmie jong u. Dei da
kumta ba u sa thoh ïa kane ka phawar.
-Ka Lam Khmat


U R. K. Narayan u la khlad.
Mynta ka miet u shong puson
ha la ka shuki kriah ne skong
bad kren shaphang “ka briew bakyrpang”.

Kynsan kynsan ka wan ha nga ka jingthrang
ban puid eksamin ïa la ka jong “ka briew bakyrpang”
na bakut sha bakut.

To ngan sdang da kaba ong ba i Mei jong nga i kham
“shisur”, i kham “kren phak phak” ban ïa i jong u Narayan.
I Mei jong nga i la shongthait, i la lop bniat, i pang shini
bad i shah pynsajia ha ka ktha khlieh bad ka byrïe thap matlah.
Haba shu kren lyngkot, i dei i tymmen banawrang.

Nga kynmaw mynba i dang long i kynthei briew banawrang.
Haba i thiah sngi i long kum ka khla: “Ka khun ***!” i ju
byrthen, “pham ai ba ngan shongthait tang shi khyllip ruh,
ka khun ksuid! Wan hangne khun ka mrad! Ngan da ioh ïa pha
ngan pyndkoh! Ngan tied ha ban da jem jai!… Khun jynreiñ!
Pha mih na ka doh pha dait ïa ka doh! Hylla biang haba
nga thiah ma nga te ngan tied ha ba phan da pah ksew!
Khun ka shiteng janor khlem pyrkhat! Kumno ngan thoh
nombar lada ngam phohsniew bha? Kumno ngan bsa ïa pha,
khun ka riewpoh?

Bad kane ka jingther nam ding ka wan phanang lang
bad ki lyngknot, ki nap, ki dong sliew ding rnong,
katba ngi her ïap her im ba i beh ba in tied da
ki siej bad ki dieng thlieh, u shñiuh jong i rangei,
ki khmat kine sawtrieij bad u thylliej pat uba kaweh
da ka jingdom khie lam bieit. Bad ngi pat ba ngi dei
tang ki khynnah ngim ju ioh jingsneng ei ei na kata
lait noh tang ban triem bha ka dem ban lait im
na ki atiar ba kham pher ki jong i.

Nga kynmaw kumno, namar ba im don khun kynthei, i ju
phah sait ha nga ïa ki jaiñ jot jaboh. Ban kyntait
ka bym lah long. Kumta, barabor nga ju tyndung ïa ki
da ki dieng bad dung synrei ïa ki ha borti nar sarang haduh
ban da kham sngur ka um. Tangba, hap husiar bha.
Ba in iohi ba nga khlem pyndonkam da ki kti ka long kaba ma.

Ha kito ki por ha Sohra ngim ju tip kata ka paiñkhana. Ngim ju
ba don kata ka paiñkhana theh um ne ka paiñkhana buh tin. Ngi shu
leh beit ïa ka kam ha ki law kyntang. Hynrei teng teng i Mei
i ju trei beit ha ka tin-khat-ñiut. Nangta ka ju dei ka kamram jong nga
ban leit rah ïa ka sha law kyntang. Ban kyntait
ka bym lah long. Kumta, barabor nga ju ber shuwa da u dpei,
nangta nga sa tap sa da ki snep kwai bad ki ñiut ki ñier
bad nga ïaleh kat ba lah ban kiar na ki marjan lorni
ne ki para khynnah. Kito kiba la iohi ïa u Kamla Hasan ha
ka Pushpak kin sngewthuh bha ïa ki buit ba pyndonkam ma nga.

Nga lah ban jer da ki hajar ki nuksa
ban pyni ïa ka nawrang bakyrpang
jong i Mei. Bad nga kyntait ban ïathuh
ei ei ka babha shaphang jong i.
Ngam dei u Narayan bad nga kyntait
ban ïathuh kumno i jynjar mynba
i pa buaid i dang im; ne kumno
i jynjar ynda i la ïap; ne kumno
i jynjar ban pynsan ïa la ar ki shynrang
bad ïa ki khun i hynmen kynthei bym don shuh
ha pyrthei, ha ka rukom ka badei.
Shaphang jong i, tang kawei nga hap ban ïaroh:
Lada in jin da la ym dei ka briew ka banawrang,
lada in jin da ïa shong kurim biang,
ngam tharai ngan jin da la lah ban ieng hangne kumne
ban pule ïa kane ka poitri mynta ka sngi.

(Lada in jin da la shong kurim biang
Da lei lei ngan nym lah ban ïeng hangne
Ban pule ïa kane ka poitri kumne.)

 


This entry was posted in 76: DALIT INDIGENOUS and tagged . Bookmark the permalink.

Related work:

Comments are closed.